पुणे : पुणे शहराला समर्पित असलेल्या पुण्यभूषण या अभिनव दिवाळी अंकाचे प्रकाशन नुकतेच वाडेश्वर कट्ट्यावर झाले. प्रसिद्ध गायक राहुल देशपांडे, अभिनेते प्रवीण तरडे आणि खवैय्या पुणेकरांची मनोभावे खान-पान सेवा करणारे वाडेश्वरचे ज्येष्ठ कामगार तुकाराम कुमकर यांच्या हस्ते या दिवाळी अंकाचे प्रकाशन करण्यात आले.
अमिताभ बच्चन यांच्या उपस्थितीत पुण्यातील यशस्वी साहित्य संमेलनानंतर पुणे शहराला समर्पित असलेला हा दिवाळी अंक काढण्याची अभिनव प्रथा पुण्यभूषण फाउंडेशन आणि त्रिदल संस्थेचे अध्यक्ष डॉ. सतीश देसाई यांनी सुरू केली. एका शहराला समर्पित असलेला हा एकमेव दिवाळी अंक मानला जातो. यंदाचा हा नववा दिवाळी अंक आहे.
डॉ. सतीश देसाई म्हणाले, ‘दर वर्षी आम्ही पुण्याला साजेशी संकल्पना घेवून प्रकाशन समारंभ आयोजित करीत असतो. या वर्षी पुण्याच्या कट्टा संस्कृतीतील मानाचे पान असलेल्या वाडेश्वर हॉटेल या कट्ट्यावर प्रकाशन समारंभ केला. याच कट्ट्यावर एरवी वर्षभर मान्यवर पुणेकरांना निमंत्रित करून त्यांच्याशी गप्पा मारण्याचा साप्ताहिक उपक्रम दर गुरुवारी सकाळी केला जातो. यंदाच्या अंकातील पहिले मानाचे पान भारती विद्यापीठाचे कुलपती डॉ. शिवाजीराव कदम यांना समर्पित करण्यात आले असून, विविध क्षेत्रातील मान्यवरांचे, पुणेकरांचे आणि अनिवासी पुणेकरांचे लेख, आठवणी हे यंदाच्या पुण्यभूषण दिवाळी अंकाचे वैशिष्ट्य आहे.’
राहुल देशपांडे म्हणाले, ‘पुण्याची अनेक वैशिष्ट्ये आहेत. पुणेरी प्रतीके आहेत. पुण्यभूषण दिवाळी अंक हे एक पुण्याचे वैशिष्ट्य बनले आहे. पुण्यात कानसेन, रसिक मंडळी मोठ्या प्रमाणावर आहेत. आज कोणीही पंडित पदवी लावतो, त्याचा सूर लागला नाही तर त्याचेही कान पुणेकर पकडतात. पुण्याची ही परंपरा आणि रसिक प्रवृत्ती पुणेकरांनी जपून ठेवावी.’
प्रवीण तरडे म्हणाले, ‘राहुल देशपांडे आणि मला बोलवून पुण्याचे सुरेल आणि रगेल सूर एकत्र आणले आहेत. पुरुषोत्तम स्पर्धा जिंकल्यानंतर पहिला सत्कार पुण्यभूषणतर्फे डॉ. सतीश देसाई यांनीच केला होता आणि आज पुण्यभूषण दिवाळी अंक प्रकाशनाचा मान दिला आहे.’
श्रीकांत शिरोळे, मकरंद टिल्लू, गोपाळ चिंतल यांनी स्वागत केले. दिलीप कुंभोजकर यांनी आभार मानले. या वेळी प्रल्हाद भागवत, सुरेश धर्मावत, रवी चौधरी, भाऊसाहेब कासट, गिरीश मुरुडकर, अभय वडझिरकर उपस्थित होते.
